🚶‍♂ *ही माणसे ....!*
            *डॉ. मिलिन्द जीवने 'शाक्य'*
             मो.न. ९३७०९८४१३८

हिरवेगार जंगल
उंच उंच दिसणारा
त्याचा तो कमानी डोलारा
एकांतात अनुभुती करणारा
किर्र किर्र आवाज
सोनपाखरु किड्यांचे
मस्तपणे रान हवेत बागडणे
आणि त्यांना पकडतांना
बगैर रस्तावरुन रानात फिरतांना
मिळणारा तो सुखद आनंद
नद्यांचा खळखळणारा प्रवाह
सोबतचं
निर्मल पाण्यातील पोहणे
थंडीच्या रात्रीतील
चमकणारे प्रकाशमान काजवे
कोल्ह्यांच्या झुंडीचे फिरणे
वाघाची भयाण डरकारी
आणि त्याची गुफा पहाण्याची
असणारी एक तिव्र ओढ
ह्या जंगलाची मुरुम वाट
ती कच्ची असतांना ही
तिचे मातीशी असलेले प्रेम
आज मी शोधतो आहे
ह्या शहरी सिमेंट जंगलात
इथे तर
सर्व काही कृत्रीम आहे
आणि ही माणसे सुद्धा ...!

गाव जिवनातील
कौलारू चार भिंतीची
आमची ती शाळा
मास्तरचा असणारा तो दरारा
आणि अभ्यास न केल्यास
छडीच्या प्रसादाने
पँटमध्ये लघवी होतांना
अन्य मुलांचे भयमय हसणे
मास्तराच्या छडीचा कोप
कधी कुणावर पडेल
ह्याचा नेम नसतांना ही
आई वडिलांची नसणारी तक्रार
आज मी शोधतो आहे
ह्या शहरी जगात
सर्व काही बदलले आहे
ते मास्तर मन ही
आणि ही माणसे सुध्दा ....!

आमच्या त्या गावामध्ये
विटी दंडीचा हा खेळ
म्हणजे आजचे क्रिकेट
आणि ते खेळतांना
येणारा आनंदमय थकवा
अचानक तेवढ्यात
साप आल्यावर
साप साप ~~~
असा किल्लोळ झाल्यावर
संपुर्ण लोकांचे एकत्र जमणे
आणि लाठ्या काठ्यांनी
सापावर एकत्रपणे तुटुन पडणे
ती आवाज एकता
आज मी शोधतो आहे
शहरी कॉलोनीतील
ह्या फ्लँटच्या संस्कृतीत
सर्व काही बघावे तर
परस्पर विरोधी भाव जग
विचार बदलणारे हे नवे पण
आणि ही माणसे सुध्दा ....!

आमचे ते गाव म्हणजे
चवथी पर्यंतचे शिक्षण द्वार
मग बापाने
मुलाच्या शिक्षणासाठी
तालुका ठिकाणी धाव घ्यावी
तिथे नविन घर घ्यावे
आणि येथुन बापाने गावाकडे
कामासाठी धापा टाकीत जावे
सायंकाळी परत घराची वाट
असा त्याचा तो प्रवास
कधी रात्र झाली तरी
मुलांना रोज भेटण्याची
असणारी ती प्रेम ओढ
आणि त्यातचं टार्चच्या प्रकाशात
जंगलातील रानडुकराचे दिसणे
बापाने घरी येवुन आम्हाला सांगावे
पुनश्च मुलाचे उच्च शिक्षण
शहराकडे मोर्चा वळवतांना
बापाने थकल्या हाताने
ते सर्व सहन करावे
आज मी शोधते आहे
ते आपलेपण
कुठेचं सापडत नाही
स्व अस्तित्वाच्या बेंडव्यात
बंदिस्त होणारे हे जग
आणि ही माणसे सुध्दा ....!

बुध्द जयंती
डॉ. बाबासाहेब आंबेडकर जयंती
ही साजरी करतांना
वस्तीच्या छोट्याशा मैदानात
असणारा पंचशील झेंडा
झाड पानाच्या आच्छादनाने
उभारलेला चार खांबाचा मंच
बुध्द मुर्ती - विहार स्थापना
कदाचीत
त्यांच्या आवाक्याचे नसावे
परंतु लाऊड स्पिकरमधुन
बुध्द भीम गीतांचा
येणारा तो मधुर आवाज
आजु बाजुंच्या लहान गावाला ही
येण्याचे निमंत्रण देत असतो
आणि सामुहिक जेवणाचा
मिळणारा तो आनंद
आज मी शोधतो आहे
ह्या मंगल मंडप - लॉनमध्ये
बफे पार्टीच्या जेवणातील
बदलणारी ही आधुनिक संस्कृती
आणि ही माणसे सुध्दा ....!

* * * * * * * * * * * * * * * * *